IGANTZIKO BANDERA ARBOLA

Bandera Arbola San Migel egunean, ekainaren 29an, mezaren ondoren, plazan dantzatzen da. Bestaberri egunean prozesioaren barnean dantzatzen da, herrian jartzen diren aldareen aitzinean. Bandera dantzatzeko errituala hura Udaletxeko balkoitik jeistearekin hasten da. Txistulariek jotzen dute horretarako doinu bat eta goiko balkoitik bi zinegotzik jeisten dute bandera udaletxearen aurrealdetik. Behean, bandera dantzatu behar duena itxoiten ari da eta hartzen du bandera. Dantzariak bitartean, taldean formaturik itxoiten ari dira ere bai, eta udala banderaren atzean prest dagoenean mezara joateko, dantza bat egiten dute bandera eta agintariak mezetara lagundu aitzin. Elizaren atarian bi lerrotan kokatzen dira eta jendea haien artetik pasatzen da. Azkenik dantzariak elizara sartzen dira dantzatzen erdiko pasabidetik aldarearen parera iritsi arte. Dantza bukatuta elizatik ateratzen dira.

Meza bukatzen delarik, dantzariak berriz bi lerrotan itxoiten dute. Banderaria eta agintariak plazan kokaturik daudenean, dantzariak sartzen dira plazan 5. kalejirarekin eta haien aurrean dantzatzen dute. Ondoren makil-gurutze bat egiten dute plazan Bandera dantzaren tokia zedarritzeko. Orduan hasten da Bandera Arbola. Honek bi zati ditu. Lehendabizikoan banderaria plazatxoaren erdira ateratzen da eta agur egiten du lau aldeetara. Bigarren zatia hasten da orduan: banderaren dantza. Banderariak, eskuin-ezker dantzatzen du bandera, bere buruaren gainetik baina lurretik hurbil eta hau ukitu gabe. 

Bandera dantzaren ondoren Igantziko gainontzeko dantzak dantzatzen dira.